Agenda dei poeti 2004

1 maggio 2004

SICILIA

Ti vogghiu beni ca tu si me Mamma,
tu mi criscisti e mi facisti omu,
e nta lu cori miu c'è la to fiamma
e nta la vucca mia c'è lu to nnomu.
Sicilia bedda, terra di li sciuri,
di zagara d'aranci profumata,
ccu Tirrenu e Ioniu fai l'amuri,
di lu Miditirraniu si la nnamurata.
Se lu Stivali ti desi la pidata
e ammari ti ittau ppi ffunnari,
Scilla e Cariddi t'anu sullivata,
tu si mpurtanti, e non poi anniari.
Ti manca sulamenti la curuna,
ma di li genti tu si ncurunata,
nun c'è stata a stu munnu na pirsuna
ca tà vistu e poi nun è turnata.
Di tuttu lu munnu tu si canusciuta
ppi lu clima e la to pusizioni,
sempre di virdi e oru si vistuta,
onuri e vantu di la pupulazioni.
Catacombi, chiesi e monumenti
d'antica civiltà; architittura
suni li provi comu documenti
di la to storia, di la to figura.
La storia to è comu na catina
di guerri, martirii e opprissioni,
ma tu si stata sempri malandrina,
ta libiratu di tanti nvasioni.
Mamma di vati, scienziati e artisti,
ca nta lu munnu ccianu la so storia,
sunu Siciliani, figghi to chisti,
si fannu onuri e resta la mimoria.
Qualcunu de litturi mi po diri
ca cci su figghi fora carriggiata,
succedi puru nfamigghia, senza vuliri,
ca nu figghiu po pigghiari mala strada.
Sicilia di tri podi simbulata
e di na facci comu na divina,
Trinacria di l'antichi fusti chiamata
e di lu munnu tu si la Rigina.

Ignazio Santagati - Melbourne