Agenda dei poeti 2004

29 dicembre 2004

CORSO BUENOS AIRES ANGOLO TUNISIA

Tran gio la cà,
la mia casa vegia,
per fa un palas
de ventiquater pian,
la cà'n due stavi
mi, quand seri un fiö,
cui miei fradei,
la mama e'l mè papà;
è'n sema a nüm
ghe stava anca'na zia
in corso Buenos Aires,
angolo Tunisia.

Mi sunt turnà,
a vedela amò'na volta,
ghe giò'l surè
e'l quinto è'l quarto pian,
in di finester
sensa serament,
se ved el cielo,
i tübi e i cann del gas,
e la mia stansa,
cun la tapesseria,
in corso Buenos Aires,
angolo Tunisia.

E tra i rutam,
che i camion menen via,
ne ciapi un tocc,
un tocc de matunela,
per scriv sura la data,
propri quela,
che sc'epen sü
tramess e paviment,
me par, cun rabia,
e cunt'acaniment.

O müradur,
ma pica no inscì a fort,
tüti i to culp
rintronen denter chi,
te fet a tocc
vint'ann de vita mia,
in corso Bueno s Aires,
angolo Tunisia.

Se stringi in man
quel tocc de matunela,
come in un film,
rivedi la mia storia,
e tüti i aveniment,
i temp de guera,
cun't i stremisi
di bumbardament.

E il primo anore...
filavi una tuseta,
de l'altra scala,
de la scala B,
mi la vurevi,
ma le..., nanca un basin,
nanca'na volta,
che la m'ha dit de si.
Un brut terun...,
me l'ha purtada via,
da corso Buenos Aires,
angolo Tunisia.

Sunt restà mal,
e seri un bel fiulet,
minga'me dess,
che sunt quasi un cifun.
Ma l'è sta mei,
perché hu spusà'na dona,
bela e bona
cunt tüt i sentiment.

L'ann ch'hu fa spus,
m'han dà l'apartament,
in altra zona,
fund de la via Rubens,
che l'è lontan,
un pö de föravia,
de corso Buenos Aires,
angolo Tunisia.

Ma quand mi'vu a Luret,
e passi per il Corso,
mi volti va la facia,
e vöri no guardà,
perché la casa növa,
la casa ch'han rifà,
tütta de veder
e de mudernità,
sarà anca bela,
ma a mi, a mi, la me pias no
e quel che manca,
mi l'hu capì giamò.

Perché ne l'altra,
ci ho lasciato sogni,
e gli anni belli
della gioventü
e adess che la casa,
la casa la g'he pü,
i sogni e gli anni
son volati via...,
da corso Buenos Aires,
angolo Tunisia.

Orlando Davià - Milano