NO’ VEDO L’ORA

No’ vedo l’ora
de poder ciaparmeli en man
e vardar come i se sgranda, come i se maura
sti graspi de ua de sta bela vegna
che finalmente i m’à lassà piantar...

L’è lì che la se rampéga,
che la scala en muro de tanti secoli fa
e ridendo ridendo, coi verdi rissi de i so pampani
la sponsa su i veci sassi snasando l’udor del tempo
e la se slarga en po’ in qua, en po’ in là
parché la sa che se ghe n’è massa
poca ua ghe sarà.

No’ vedo l’ora
de restar encantà a vardar come sti arzimi
i se goda e i se gira a ciaparse el sol:
i par tanti bei recini
che se mete en pingolon.

I è lì che i ussola sìti sìti, le me parole da imamolà
pensando zà al mosto, ai sugoli che se farà
o forsi a portarne qualchedun su le arele
par gustarmeli el giorno de Nadal
pur savendo ben, che meio saria,
lassarli passir su le tirele.

No’ vedo l’ora
de podermeli ciapar en man
spilucandoli en pochetin par golosità
e come fusse sta tuto merito mio
portarmeli en casa, en meso a la tola
ringrassiando Dio de tanta belessa e de tanta bontà.


Anita Peloso Vallarsa - Arcè di Pescantina (VR)