Agenda dei poeti 2011

5 gennaio 2011

ESAMM DE MATURITA’

Ve vedi passà, i liber sòtta al brasc
cont on ciccin d’emozion e paura
cont i sciattitt denter al petasc
ma stii tanquii l’è minga tròppa dura
parli di esamm de maturità
per ‘ndà denter in la maggior età.
Ve vedi passà, tutt quant a gruppètt
scherzii e cicciarii per minga pensagh
stanòtt gh’avii nanca toccaa el lètt
incoeu dovii dà el mei, dovii a dagh
con l’interrogazion e la tesina
a la commission faggh ‘na quai moina.
Ve vedi passà, i ultim dì de scoeula
poeu via, quasi tucc a l’università
e in di liber resterà ‘na quai vioeula
che sto gran dì l’andarà a ricordà;
chissà! Se poeu anmò ve vedarii
promèss! Sì! Tanti, poeu tucc a sparii.
L’è ‘na roeuda che la gira inscì
anca mì hoo proà i stèss emozion
quand andavi ai esamm quèll vègg dì
gh’avevi la stèssa apprenzion
tutt sommaa a l’è minga sto gran chè
hinn difficil? Ma fimm on gran piasè.
Ve vedi passà, per l’ultima vòlta
al diaol el latin, el grècch e la stòria
gh’avii el coeur che l’è tutt in rivòlta
sto amor semper gh’avarii in memòria
perchè el primm amor el se scòrda mai
poeu si diventaa grand sii pù bagai.
Tutta la vita se ricorderà
chì bei dì, di esamm de maturità.


Renato Colombo – Vignate (MI)