Agenda dei poeti 2015

6 agosto 2015

MA SEMM A MILAN Ò A L’ESTER

Che stuffida a vedè kebab e cines
trattorii che nel temp s’hinn trasformaa
doe ‘na vòlta mangiaom milanes
dess hinn lì tutt quant pien d’emigraa
Milan a l’è diventaa on rebelòtt
passom e sentom pù profumm de risòtt.

Disen che l’è la globalizzazion
ch’el mond l’è diventaa tròpp piscinin
sarà, ma a mì me ven on gran magon
nissun che sa pù se l’è l’erborin
pòr el mè Milan, pòri milanes
se semm impienii de giargianes.

Òss bus, rostin negaa, la barbajada
i mondeghili, busecca e cotoletta
anca la tradizional panerada
tra on poo perdaremm anca la rizetta
ve ricordii quand serom piscinitt
se mangiava luganega e nervitt.

Dess la cusina s’è imbastardida
mangiom el pess cruu di giappones
al mè coeur a l’è ‘me dagh ‘na gran ferida
vedè ‘me semm consciaa numm milanes,
ma mì voo innanz cont i tradizion
prima che tiren via el panetton.

Tra kebab e involtini primavera
mì ghe capissi pù on bell nagòtt
che bell quand gh’avevom la fondeghera
invece de tutti ‘sti ballabiòtt
‘sta integrazion la me pias nò
milanes voeuri mangià ancamò.
Numm che del risòtt serom maester
dess me domandi, ma semm a Milan ò a l’ester.


Renato Colombo - Vignate (MI)