Agenda dei poeti 2006

5 gennaio 2006

I CLASSIFICATA PREMIO INTERNAZIONALE DI POESIA  AGENDA DEI POETI 2005 SEZ. DIALETTO


MI , TI, E&
Iersera m'haa ciappaa on poo de magon:
i fioeu gianmò lontan e indifferent,
lù che el sbragia settaa in television,
perché el s' Milan l'è ancamò perdent.
E compagn de quand me troeuvi in de per mì,
me son settada giò in sul paviment:
in scossa on liber de fotografii,
in del coeur on garbuj de sentiment.
"Due giovani camminano nel sole
dietro di loro si intravede un prato,
lei gli sorride coi capelli al vento,
lui l'accarezza con lo sguardo innamorato."
Ma seromm numm?
ma seromm pròpi numm?
Sì, seromm numm, sigura che l'è vera!
Seromm numm: mì, lù e la primavera.
D'on bòtt me son trovada a caragnà,
a domandagh (savevi nanca a chi!)
de damm indree el splendor de quella età
e, soratutt, i sògn di quj fioeu lù.
Voeuri 'vegh ancamò i mè bej vint'ann,
i oeucc pienn de stell, la bocca innamorada,
el morettin che el me tegneva per man,
la lus del sô& in di cavej& sbiancada.
Tiri su el coo: dedree de mì, in del specc,
me 'spetti de trovà el morett de alora;
domà che, adess, me se presenta on vecc
stremii e impalaa a vardà la soa resciora
(che poeu son mì)
che vôsi e che caragni
e, anmò, torni a vôsà:
l'è colpa de nissun s'hinn passaa i ann,
ma che fadiga dich de sì a la realtà.
Serri su i oeucc; inscì poeudi negà
anca el mè d'on rifless, stracch e sfiorii,
che l'orelog del temp m'haa rifilaa,
insema ai dispiasèe, senza sparmì.
Sòttvòs i tò paròll in di mè cavej:
"perché te pianget, car el mè beleè?
Hinn minga tutt passaa i moment bej;
poeudom viven anmò, basta vorè.
Rid, gioia mia, rid insèma a mì -
la vôs l'è fòrta, l'è la vôs d'on fioeu -
và el tò balòss se l'è andaa a scernì!"
mì guardi e ridi: l'è on fior del nòst poggeau.
"Due anziani sposi si guardano in silenzio,
illuminati dal miracolo di un fiore;
gli occhi di lei si accendono di stelle,
quelli di lui sorridono d'amore."
Ma sèmm numm?
Ma sèmm pròpi numm?
Sì che semm numm,
i mann ligaa in d'on fior.
Semm anmò numm;
mì, tì, e& l'amor"


Grazia Sullo Ogliari - Milano