Agenda dei poeti 2006

18 gennaio 2006

SU MARE

Zigante moderadu,
cun s'andantzia brullana
collunas ogos e mente,
intzegande a ti sighire.
Ti colant subra attrividos,
abolordant, apitigant,
no iscurtant lamentas.
Assora t'incrispidas,
arrennegosu, pones ispreu,
dissipas appentos, fainas,
t'iscutulas arrefuzos istrobosos.
Undas ruinosas
attripant roccas e costas,
trazant, ingurtint,
castigant innotzentes.
Pranghent disterrados,
ispozos che puzones.
Como, chietu, ti seras,
regolles su disisperu issoro;
disprasiu dissimulas,
murigas in sas intragnas tuas,
torras carenas chena alenu,
ninnandelas lastimosu.
Tzunchias a s'iscusa;
lambrigas bundantes e tebidas
surcant sa cara.
Tue puru as unu coro
chi tocheddat e istimat.
In abbas pasidas,
coloridas de arghentu,
pasant silibas de luna,
in serramanu de isteddos.
Sa vida, frorit ancora,
sustenta da s'isperantzia
chi non morit.

Giovanni Antioco Mura - Ghilarza (OR)