Agenda dei poeti 2017

22 maggio 2017

NA BICI...FORAVÌA

Mës-cià con ij pensé ‘d na masnà,
stërmà ant ij seugn, a-i era na bici:
chila a vivìa polida, lustra e colorà
andrinta a le vite fàite ‘d sacrifissi.

Ëdcò mi, an col temp, ant ël mè... cit,
smiciava chi le doe roe a l’avìa già:
mi i stasìa mal, a jë sparìa cò l’aptit,
se ij blagheur a passavo ‘nt la sità.

Ma ‘dcò dòp, vardand coj manifest,
na sugnava un-a lusenta da dovré
cola con coj color bianch e celest
ëd col campion ch’am fasìa sugné.

A l’era na Bianchi, fija dël mè Airon,*
ch’an dasìa le emossion pì gròsse:
antant a-i passava col temp pì bon
sugnand coj color e le roe balòsse.

Peui, un di, na bela bici a l’é... surtìa
bianca e celesta, ma ciamà “Glòria”,
a l’avìa l’istess nòm ëd na bela fija
soagnà dij color ch’a fasìo la stòria.

Mi i l’avìa cò në strass për lucidela
e col bel sol, gelos, as la carëssava;
ma a l’è nen servù gnanca gropela:
pòch dòp, un lèder, via as la portava.

Ansema al campion, ch’a l’era mòrt,
cola bici dij seugn a l’è ‘ndasne via:
për tuti doi a l’è rivaje l’istessa sòrt.
Për finì na stòria ‘d na bici... foravìa.

*Suvernòm dàit a Fàusto Còppi
(Dedicà a Fausto Coppi)


Attilio Rossi - Carmagnola (TO)