Agenda dei poeti 2017

1 ottobre 2017

RIVEN ADESS

Riven adess i bej color de ottober;
i ross spegasciaa
insema ai giald e ai verd
‘me on quader d’on pittor
de granda fantasia.
E ti t’el vedet minga domà in di bosch,
ma anca in di proeus de Milan,
sui piant, in mezz ai cà;
l’ottober l’è dree faa
el sò mestee special.

Hinn nò color de mort,
hinn nò color nervos;
te dann ‘na pas a vardai
che l’è on piasee
e ti te s’insognet domà
de vess a cà
vesin al foeugh,
cont in man on bell biccer de vin
e on poo de peladei in d’un scartòzz.

Anca la nostra vita la gh’ha
el sò bell mes de ottober,
quand te pòdet sta quiett
on ciccinin pussee, senza corr
‘me on matt de dì e de nòtt,
che te se incorget nanca
che i ann che hinn ‘dree a passaa
a cà riessen nò a tornà.
Adess che l’è rivaa anca per mi
el me mes de ottober,
voeuri viv alegher tutt i mè dì,
fìnalment insema a ‘na dòna
che la morisna i mè oss
in del sò amor.


Patrizio Albertella - Bèe (VB)