Agenda dei poeti 2014

16 ottobre 2014

PAPA FRANCESCH

L’è stada ‘na sorpresa per el mond
quand el Papa l’ha daa i dimission
emm capii ben ò semm andaa a sconfond?
L’era tutt vera ò on illusion?
Perchè in latin Lù l’eva parlaa
“son vegg, foo fadiga a gh’hoo pù de fiaa”.

L’ha ciappaa tucc i fedei de sorpresa
eren secol che el succedeva nò
l’era minga preparada la Gesa
“mì ghe la foo pù a stà chì ancamò”
inscì el s’è ritiraa in convent
a pregà per el mond a pregà per la gent.

Tutti i Cardinai hann dovuu riunì
in conclave per elegg on Papa noeuv
hann faa anca svelt a l’è duraa duu dì
on poo d’assestament on poo de proeuv
poeu la fumada bianca emm vist
per el noeuv apostol de Gesù Crist.

Lì gh’è staa la sorpresa di sorpres
on Papa ch’el vegniva de lontan
sì, ma i sò nòni eren piemontes
sarà per quest che l’è vun giò a la man?
El và anca in metropolitana
ghe pias pròppi minga sbatt via la grana.

Con la cros de ferr, senza la mantella
umil come i pussee grand gh’ann de vess
con la faccia sincera s’cetta e bella
con Tì la Gesa l’andarà tant a cress
gh’emm pròppi bisògn d’on Papa inscì
per tutti i gent cercà de convertì.

El Spirit Sant l’ha vist pròppi giust
per mett a pòst el mond cont el sò trambust.
Voeuri dì on grazie a Papa Bergòglio
e el disi a vos alta con grand orgòglio


Renato Colombo - Vignate (MI)