Agenda dei poeti 2017

26 luglio 2017

CONFESSIONE

Ve seca se ve parlo de mi un poco?
No go ancora deciso cossa dirve,
ma- stè tranquili - no contarò floce!
No ve descrivarò come son fato,
quanto che peso, se son alto o basso;
ve dirò inveze robe più importanti,
che se ghe conta solo ai veri amici.

Mi son un che ga sempre zercà robe
dificili, rognose, complicate;
son un de quei che volaria le zate
indrizarghe ai cagneti; son insoma
un che, cola redina de farfale,
el zerca de ciapar le nuvolete
su in ciel, co ‘1 xe tuto batù de stele.

Qualchedun forsi za de mi ga dito:
"El xe un iluso, un poco baziloto"
o, scassando la testa: "El xe un artista"
(che po, pensando ben, saria '1 istesso
per la gente che in cuor suo xe convinta
de gaver la rizeta più sicura
per viver senza 'ndar fora dei copi,
per seguir quela che la gente ciama
normalità, bon senso, pie per tera).

Cossa ve devo dir? Domandar scusa
per esser quel che son, per quei difeti
che me fa diferente de quei altri?
Forsi dovessi... forsi saria giusto...
Ghe xe un per de persone che la vita
gavessi avù diversa, se diverso
mi fussi stado; a queste ghe domando
de perdonarme per quela redina
che sempre svoda la me xe restada,
per quele nuvolete, che ciapado
no go mai, pur gavendo corso sempre,
per le speranze e i sogni, che distrato
qualche volta me ga dele altre robe,
che, forsi, saria stade più importanti.

Crederne: no xe stada cativeria
questa mia! Iero come un de quei sorzi
che drio del piferaio dela fiaba
coreva e no podeva mai fermarse.


Mario Manfio - Trieste