Agenda dei poeti 2017

6 giugno 2017

LÀGRIMA

La luci era assumendi da la pinziuta
lu primu calori dilla dì ni facia pisà ill’aria
un prufumu di macchja e di marinu,
lu maistrali di la notti facia intindè
la muita di lu mari;
illa colti li primi ciocchi
e in casa s’intindiani li passi
sgasgiumoni dilla nonna,
la ciurrata eri cumincendi;
la stedda i lu lettu era fastidiosa,
la manu di la mamma decchita
li tucchesi la cantegghja
e cun un basciu i la fronti la sciutesi;
lu fiacu di lu caffè si ispaglìa illa casa
la stedda era in pedi
la cara netta e profumata di saoni biancu
si pusesi lestru illa banca di cucina
aspittendi di smulzà;
la nonna arriesi cu la cuppetta e li canestri
la mamma era ghjà pronta
cu lu panneddu pa la scola,
lu cani illa colti abbagghjaia avvisendi
in carrera c’era ghjà la cumpagna aspittendi,
la stedda senza ascultà li parauli dilla nonna,
pa la pressa si n’andesi senza agabbà di smulzà,
ma iscendi agguantesi la canestra;
la mamma da lu balconi li raccumandesi,
“a scola stai attenta e nun fa attidià la maestra”
la stedda brinchittendi era ghjà
a cuntrastu cu l’amica,
la boci di la mamma nu l’aja intesa
tutti li dì li dicia sempri li stessi parauli,
la mamma figghjulesi cuntenta la stedda allalgassi
cu l’amica una làgrima l’infundì l’occhj;
un ammentu di candera stedda.


Guida Antonio - Santa Teresa di Gallura (OT)