Agenda dei poeti 2014

27 giugno 2014

NNAMMURATI

“Ci era... ci era nu zinzale
sapia iuo dhu t’era pizzicare!
Me mintia a 'ncanna lu sarviettu
e chianu chianu, ‘nfilatu lu liettu,
‘ncignava sucare llegramente
susu na minna ca sta pindente.
 
“Sine, e mo’ me fazzu pizzicare
de tie, ca nu sai mancu ulare!
E poi dimme, dimme, te pare
Ca nu te putia scrafazzare?!"
 
“Ma iou ulava... ulava de notte
tandu nu me poti dare botte!
Me ne scindia manzu, manzu
chiù’ sutta cu fazzu lu pranzu.
Ma forsi era meju... me piacia
a dha ssutta cu me durmiscia.”
 
“Sine, ma quandu tie oli fiscandu,
nnanzi a ricchia mia, tandu
dici ca nu me scia discitandu?!
Te zziccu pe’ l’ale e te ne mandu!”
 
“E dici ca iou su’ cusì minchia
ca te olu propriu nnanzi a ricchia?!
Trasendu de le finescie perte,
me ‘nfilu sutta alle cuperte
e ... panza mia fatte capanna!”
 
“Cittu ca sta rriva a mamma!”


Mauro Serrano - Ronago (CO)