Agenda dei poeti 2011

18 maggio 2011

‘A TAVERNA D’U PAISI

Sidutu a un taulu
cû na cannata di vinu e un biccheri,
l’omu pinzava di putiri scurdari
‘i so’ tristi pinzeri.
Non curanti d’i prisenti
‘u biccheri jncheva,
poi pusava ‘a cannata,
e chiudennu l’occhi biveva.
Quanti biccheri dda sira
lu poviru sfurtunatu inchìu,
tantu chi la mani ci trimava
ma a la fini tutti si li bivivu.
Quannu ‘a cannata e ‘u biccheri
vacanti ristaru
cû l’occhi si girò ‘ntornu
e fici segnu a lu tavirnaru.
Poi seriu e pinzirusu ci dissi,
portini nautra cannata non ti siddiari
e inchennu ‘u biccheri e bivennu,
non faceva autru chi tistiari.
Quannu poi a la fini
‘a cannata vacanti finiu di pusari,
si misi ‘a testa ntra li mani
e sulu si misi a parlari.
Travagghiavi na vita,
dudici figghi avanti purtavi
e dopu tanti sacrifici,
sulu comu un cani ristavi.
Dici giustu l’anticu pruverbiu
chi ripiteva sempre me matri,
“Un patri campa centu figghi
e centu figghi non campunu un patri”!


Giuseppe Li Voti – Capri Leone (ME)