Agenda dei poeti 2011

25 ottobre 2011

PIOGGIA

Piovi. El ciel xe grigio, de quel grigio
che fa capir che no cambiarà tempo
per tanto ancora. La vien zo pulito,
tanto che par, vardando oltra le lastre,
che qualchedun staghi tacando fili
de nailon fra le nuvole e la tera.
Sul’aqua, che se ingruma nele conche
del saliso, drio man se forma e disfa
tanti cerci, man man che zo le ioze
le casca, le rimbalza, le ricasca.
In casa xe scureto e te vien voia
de meterte là, in zito, in t’un canton,
a spetar un qualcossa che ti gannca
no te sa coss’ che sia... el sol che torna?
o no pitosto anca una nova vita?
Cufolato in poltrona, de traverso,
coi oci strenti, tuto zito ‘torno,
el zerve1 pol andar dove ghe piasi:
andar drio ai sogni o... aie malinconie;
de novo caminar su quele strade
che za ‘1 ga fato, o ‘ndar zercando trozi
fra i sassi, con gran ris’cio pei zenoci.
Drio le coltrine, intanto, sule lastre,
pian pian vien zo una ioza, rodolando
… perchè me sento come un grizoleto
sula ganassa e un senso de bagnado?...


Mario Manfio – Trieste