Agenda dei poeti 2010

13 settembre 2010

CERCARE

Go passado la vita intiera
zercando una porta, una strada,
che rivar me fazessi là,
indove fussi vivi, reali i mii sogni…
e sbatù tante volte go ‘l muso
contro quei che pareva portoni
e che iera inveze miragi.
Forsi voi gavessi ragion,
se disessi che iera un fià grave
‘sto zercar senza mai trovar gnente…
Per de sora però mi gavevo,
come un faro, ‘na granda speranza,
quasi come la stela cometa
che portado a Bedeme ga i Magi…
‘Desso i altri me credi tranquilo:
“Finalmente - i pensa - capido
el ga che la speranza xe bela,
ma de raro la sa trasformarse
in qualcossa che no sia ilusion”.
Mi inveze rimpianzo quei sogni,
le speranze, le ... porte sul muso,
perchè fin che strussiavo, zercavo,
d’esser vivo mi iero sicuro
e gavevo davanti un doman…
‘Desso che mi no go più speranze,
xe la vita ridota a metà
e sperar posso solo che un giorno
sui mii ossi un fior vegni a pozar
qualchedun che me ga volù ben…


Mario Manfio - Trieste