Agenda dei poeti 2006

3 aprile 2006

QUAND SERUM FIULOT

Che belèsa quand serum fiulot
in via Cantoni al nümer vot
l era una ca de quei de ringhera
giügavum la bala matina e sera.
Ciamavun foera la mama
vusavum in mes a la strada
per dig de büta giò
el pan e marmelada.
Al punt de la ghisulfa
sü e giò cui carelot
o in gir per la Buvisa
a fa un pu de casot.
Indue saran andà
tüti chi bèi pinèla
che cureven in mes al prà
de la nostra vita bèla.
L era düra quand serum fiulot
in via Cantoni al nümer vot
l era un presèpi de bravi cristian
tiravum avanti in mes ai malan.
I sciuri savevum che gheren
però i avevum mai vist
la gent che ghera inturna
l era fada de pori crist.
La cà l è brüsada tüta
sota i bumbardament
sem resta li ammò tüti
ma propri sensa gnent.
El cünt curent mia mama
ghe l aveva in del prestiné
nüm andavum a toe el pan
lü el marcava giò i dané.
L è stà un sogn quand serum fiulot
in via Cantoni al nümer vot
anca se ghera poc o nient
gavevum el ben di noster gent.
L era una primavera
serum fiulot giucund
cuntent e sudisfà
de ves vegnü al mund.
Serum cuntent perché
gavevum una cà
indue ghera denter
la mama cu l papà.

Franco Valsecchi - Cinisello Balsamo (MI)