Agenda dei poeti 2005

29 settembre 2005

ON LIBER VÈCC

Casci denter i man tra i liber vècc
indoe la carta l'è impolverada,
dent la bottega i pign riven al tècc,
foeura fa frècc e gh'è la serenada.

I stèll se spèggen bèi in del Navili,
liber e liber me pirlen per i man,
a pòcch a pòcch foo lì on gran scompili,
starissi a ravanà fin a doman.

El soo nanca mì quèl che voo a cercà,
ma on liber vècc con la covertina
ligada cont el spagh l'è lì a vardà
la mia intenzion che la dondina...

El dèrvi, el gh'ha pussee de quarantann,
scrivuu da on tal poètta meneghin
cont ona dedica spegasciada a man
a on so amis, cont on penser de fin.

El ghe dis 'me ona raccomandazion
de apprezzà sempre el nòster dialètt.
La me par quasi ona implorazion
de tegnì a ment e semper de ripètt.

El toeuvi e ormai voo pròppi via...
El sfoeui e me incòrgi domà 'dèss
ch'el se ciama "Freguj de poesia".

Foeura coi stèll mì sont in compagnia...
Lì col Navili, col mè liber apprèss
in sta serada gh'è on poo de magia.

Carlo Albertario - Milano