Agenda dei poeti 2005

9 gennaio 2005

S'AZUDU

Perunu lamentu
pro dolore o azudu
si est intesu in s'aera.
Innanti su dovere,
sullevare frades disamparados,
chena afficos, né isperas,
fit s'impitu primarzu.
Una manu amiga, callente,
pro iscaldire sas frittas,
assadas, tullidas,
chi esserent ischipidu retzire
e partzire in sa carestia.
Abortas, irriconoschentes,
chena franchesa, né piedade,
istrapatzant allibregos e amistade.
Cussentzias anneuladas,
ponent in mente
a bramidos de benes e onores
chi non serbint pro biver
e gosare impare.
Bois chena timoria,
chena connoscher imperò,
cun istima sintzera,
azis abbrazzadu
s'anzena malafada,
perdinde sa vida osta,
ite ricumpensa
podimos dare a sa volontade,
a sa nobilesa chi nos amparat.
Pregadorias chi diant corazzu,
operas chi annestrient
chie non connoschet
s'importantzia
de esser unidos in paghe.
Su sacrifitziu ostu,
chietu, at a esser riconnotu,
proite, su bene, s'ispraghet
cun su bene matessi.

Giovanni Antioco Mura - Ghilarza (OR)