Agenda dei poeti 2004

4 gennaio 2004

SA VERA PAGHE

Nasches attempada
e moves impitada,
comente su tempus.
Ischeras sinos protzedios
jandedi chena contu
ue sa cuntierra e s'ampramanu
cumandant cun manu frima.
Non campas fatta cun assimbizu
o imponindedi a poderiu,
sa forza t'isfaghet che rosu mascu
a sos lugores 'e s'arbeschida.
Ti chirco bramosu, chena briu
cando ti apartas
e bivo in s'imperò
'e ti aer che innanti.
Assoras,
in sa mudenzia infadosa
ti apretzio menzus
e istimo s'anneu
de chie semper ti disizat,
ma non ti podet tenner
proite àteros ti negant.
Impitandedi pro partzire
est che ti dissipare.
Fiza 'e armas feridoras
o de arriscos criccados
ses solu unu trumizolu
'e sinnos istunigos
appuntados in su paperi.
Su menzus logu pro te
sunt sas cussentzias,
s'intragna 'e donzunu
brassolu 'e paghe pro totu.
Si mudent sas mentes ispozas
cun sinzeridade e sientzia:
s'umanidade at aer ricumpensados
impinnos e fadiga
pro ti chircare e ti mantenner.

Giovanni Antioco Mura - Ghilarza (OR)